يا الله يا اللي نبتهل لـك ونخشـاك =يا خالـق الدنيـا ورافـع سماهـا
يا واحدٍ ما هي بتحصـى عطايـاك =لخلق كل الخلـق محـدٍ حصاهـا
الجود من جودك وعطفك وحسناك =يا مستجيب الداعيـه فـي دعاهـا
أنت الكريم اللي نخافـك ونـدراك =لولاك نفسـي مـا تحقـق مناهـا
إنك تثبتني علـى غايـة ارضـاك =عبدك ولا غيـرك حياتـي ولاهـا
سجدت لك يا دايـرٍ كـل الأفـلاك =يا غاية الشكـوى ويـا منتهاهـا
لولاك يـا رب السمـاوات لـولاك =ما تقبل التوبه علـى مـن نواهـا
يا العبد مالك غير ربّـك ومـولاك =كل البشر تفنـى ويمحـى ذراهـا
اهْو الذي صوّرك سـوّاك وأنشـاك =إعجاز ما وصل البشـر مستواهـا
لا تشمت العالم وتنسـى خطايـاك =احكم هوى نفسك وحاسب خطاهـا
حاسب ضميرك قبل لا تدفع خطـاك =كم من قدم قلب المشقـى حفاهـا
عليك بالإحسـان والـرب يحمـاك =من قدم الحسنـات يلقـى جزاهـا
شيطان نفسك لا يغـرّك ويغـواك =قبلك غوى نـاسٍ وكـدّر صفاهـا
من زمرة الطاغوت حذراك حذراك =لا تبتلي بجروح يصعـب دواهـا
وإذا مشيت اعرف دروبك وممشاك =احرص على نفسك وخالف هواها
أمّارةٍ بالسـوء مـا هـي بتنهـاك =اقبض عليها لين يجلـى صداهـا
اقطـع نواياهـا بدينـك وتقـواك =هلّـل وعنـد الله سريـعٍ شفاهـا
والعين لا تنظر بها مـن تعـدّاك =المحصنه لو تلتفـت لـك وراهـا
اصبر على همّك وغمّـك وبلـواك =عف وتعفـف لا يغـرّك حلاهـا
واترك حرام القوت ما هو بيمـلاك =كل البطون الجايعـه مـا ملاهـا
رشفة حلال اتسد جوعك ومضماك =تسوى مشاريب الحـرام وغثاهـا
النار في جوفك وتصلـى حنايـاك =نار الجحيم تزيـد للـي وطاهـا
واحفظ لسانك لا يجـرك ويبـلاك =اخذ الثمينه لـو غلـى مشتراهـا
الهرج ميزانك ويكشـف خفايـاك =كلمـة تعيبـك لا تبيّـن نبـاهـا
صون الكلام وصون نفسك ومبداك =للنفس حشمـة لا تفصّـم عراهـا
اصمت مدامك عارفٍ سير مجراك =لا تنقـل النّمـة وتبحـث خفاهـا
يزول قدرك عند أقـرب دنايـاك=لو هو ولد عمّـك حياتـك جفاهـا
واحلم تراه الحلم يرفـع مزايـاك =هو سيّد الأخـلاق هـو مبتداهـا
وصّى به المبعوث ما هو بيخفـاك =شفعينـا يـوم المـلاقـاة طــه
خل الجهل لا تجعل الغيظ ياطـاك =ترى الجهل سم القلـوب وعماهـا
وإلى ابتليت ارفع إلى الله شكـواك =لا بدّها الأيـام تكشـف غطاهـا
اصبر يزين الحظ ويزين مرمـاك =الله يفرّجـهـا ويـدفـع بـلاهـا
لا تمنع المحروم لا مـن تنصّـاك =الناس لأجل الناس وأحسن عطاها
ابـذل لوجـه الله والله يـجـزاك=مثل الغروس اتطيب للـي سقاهـا
لا ضاع معروفك ولا ضاع حسناك=إن كانهـا لله تلـقـى جـزاهـا
جارك ولو هو جار تسقيه من ماك=عليه لا ترفـع يدينـك عصاهـا
أحسن جوار الجار لو كان يشنـاك=ترى العرب تحشم كلاب اقصراها
بكـره يشـد ويكتـب الله فرقـاك =عساه يذكر جيرتـك مـا نساهـا
الظلم شين ويجعل النـار مثـواك=راع الظليمه عيشتـه مـا هناهـا
فوقك إله العـرش عالـم نوايـاك =ينظر قلوب الناس وش محتواهـا
يسمع بما تجهر وعارف خفايـاك =بأمره شروق الشمس ترسل ضياها
هو عالمٍ غيبك وركّـب خلايـاك =هو خالقٍ فيك العـروق ورواهـا
والضيف له حقٍ إلى حل بحمـاك =قلّط ضيـوف الله وأكـرم لحاهـا
لا تحقر الضيفان واتشـح بغـذاك =من ما عطـاك الله قلّـط عشاهـا
وعليك باللي حزة الضيـق يفـداك =لا شانـت الدنيـا ودارت رحاهـا
لا من زهمته لو على الموت لبّاك =عيني لجل عينك وروحـي فداهـا
ترى الخوي نبراس روحك وملْجاك =لا كلّحـت بقعـا وزادت غثاهـا
حذراك من بعض المخاليق حذراك =بعض العرب ما تفرقه من نساهـا
تايه وضايع بيـن ذولا .. وذولاك =فيـه الجهالـة واصـلٍ منتهاهـا
لشاعر راشد بن زميع القحطاني