تسكت على اخوك وقت الغلط؟

المشاركة الأصلية كتبت بواسطة إماراتيه

شكرا على الليت الاخضر ياخويه =)



مثلا موضوع تحت القطيفه ..لاحظت انه انتشر في الاونه الاخيره ..
وفي مثال في منطقة بين الجسرين في ابوظبي او بني ياس .. بصراحه خانتني ذاكرتي .. الموضوع كان من 2 مراهقين .. واحد في سن 18 والثاني 19 .. وتقاتلوا بسبب بنت .. وهم شرات ماذكرت مراهقين .. يمكن الاسباب كانت نقص حنان واهتمام ف عوضتهم البنت لدرجة انهم تجاتلوا عشانها !!
في امثلة حيه تصير .. واغلبها من التيين إيجر ..
بس في اختلاف مع الاخ تحت القطيفه .. اللوم لا يقع على الاهل ياخويه مثل ماقلت لك في اهل يتعبون ويربون احسن تربيه ولكن الشخص نفسه هو اللي يسوي بعمره جذيه او اسباب تخليه جذيه مثل رفقاء السوء .. نقص الوازع الديني في نفسه .. بس مش الاهل .. نادرا تلقى حالات يكون الاب او الام مسؤولين عنها .. ولكن الاغلب من المراهق نفسه .. وسبحان الله في ناس هلهم يعطونهم الثقه يكونون قدها وفي ناس لا .. =)

اي حد عنده مثال او تعليق على الكلام اللي انطرح ياريت تتجاوبون معانا ..

صح يا اماراتيه لازم نعترف انه في شباب صايعين يطلعون من بيوت مافي أحسن منها و من عند أهل أصحاب دين
لكن تعرفين في بعض الأهل يربي الطفل بس و هو صغير بعدين يقول خلاص ستوب
بس أصلاً جزء من التربية هي المتابعه المستمره لأنه مهما الواحد كبر تربية الأهل أبداً ما توقف
يعني لازم الأهل يحطون قوانين لعيالهم ماهو يخلوا الدنيا سايبه
يعني يحطون له قوانين للطلعه و الدخله، يعطون الولد حد للسهر، يتعرف الأب على ربع ولده، يعرف وين يروح و شو يسوي
عشان الولد يعرف انه في اهل وراه بتحاسبه لا غلط و يفكر مرتين قبل لا يسوي شي

تحت القطيفه انا ببشر ذي بتاخذك انه عيالها بيمشون على الصراط المستقيم

المشاركة الأصلية كتبت بواسطة تحت القطيفه

صح يا اماراتيه لازم نعترف انه في شباب صايعين يطلعون من بيوت مافي أحسن منها و من عند أهل أصحاب دين
لكن تعرفين في بعض الأهل يربي الطفل بس و هو صغير بعدين يقول خلاص ستوب
بس أصلاً جزء من التربية هي المتابعه المستمره لأنه مهما الواحد كبر تربية الأهل أبداً ما توقف
يعني لازم الأهل يحطون قوانين لعيالهم ماهو يخلوا الدنيا سايبه
يعني يحطون له قوانين للطلعه و الدخله، يعطون الولد حد للسهر، يتعرف الأب على ربع ولده، يعرف وين يروح و شو يسوي
عشان الولد يعرف انه في اهل وراه بتحاسبه لا غلط و يفكر مرتين قبل لا يسوي شي

فعلا ياخويه كلامك صحيح بس فعلا المراهقين شي ثاني ..
تربيتهم صعبه .. غير جذيه ان مافي شي يرضيهم .. يبغون اللي في راسهم يستوي !!
بس كيف المفروض الاهل يأمرونهم بالقوانين بطريقه حلوه !! هل ممكن يتقبلونها .. مثلا واحد عمره 17 سنه تتوقع شو ردت فعله لو ابوه قال له الساعه 10 انته تكون في البيت !!

يا اماراتيه اذا هو متعود من صغره انه في قوانين و أهل وراه، ما بيستنكر انه أبوه يقوله هالكلام و لا بيستغرب
و أصلاً شو 17؟ والله انه جااااااااااهل في هالعمر
بعدين بالله عليكم شو بيسوي بعد الساعه 10 برا البيت!؟

واصلا يا قطيفه لو هو طالع الصبح, وش بيطلعه الليل؟ ما وراه اهل ولا دراسه ولا نووم؟
وربي اكبر مصخره ذيب تحصل في بيوتنا ونحن ساكتين....

ويا جماعه وش الاماكن الللي تفتح في الليل اصلا؟ انتوا عارفينيها, حتى لو بيروح المول وش وديه آخر الليل ليه ما يروح الصبح؟؟؟؟
يلا انا ذيب احرش ليكن ان شا الله في حد من يستميييع لي

هههههههه ,,
تحت القطيفه
انا اعرف ان 17 ياهل .. لكن مراهق ..
وحتى لو في قوانين من صغره .. بيكبر بيقول انا ريال محد يروم يتحكم فيني او شي جذيه
حتى في مراهقين الاحترام مالهم يختفي فجأة ..
أي قوانين اللي تتكلم عنها !! .. الحين عادي هم يمشون قوانينهم على هلهم
كثرت عقوق الوالدين هالايام

المشاركة الأصلية كتبت بواسطة تحت القطيفه

صح يا اماراتيه لازم نعترف انه في شباب صايعين يطلعون من بيوت مافي أحسن منها و من عند أهل أصحاب دين
لكن تعرفين في بعض الأهل يربي الطفل بس و هو صغير بعدين يقول خلاص ستوب
بس أصلاً جزء من التربية هي المتابعه المستمره لأنه مهما الواحد كبر تربية الأهل أبداً ما توقف
يعني لازم الأهل يحطون قوانين لعيالهم ماهو يخلوا الدنيا سايبه
يعني يحطون له قوانين للطلعه و الدخله، يعطون الولد حد للسهر، يتعرف الأب على ربع ولده، يعرف وين يروح و شو يسوي
عشان الولد يعرف انه في اهل وراه بتحاسبه لا غلط و يفكر مرتين قبل لا يسوي شي

بالضبط المتابعة مهمة أنا أؤيدك بذلك بس ماذا ستفعل لو عاندك المراهق و خالف القوانين؟ما هو الحل في هذه الحالة؟

هب هب انا جيت


انا اعتبر مراهقه اقولكم شنو نحتاج


انا لما الواحد يهاوشني او يضربني والله اني اكرهه


وحتى لو قصدة مصلحتي بس انا انسانه افهم وكبيرة


ترى لما يجي الواحد ويشرحلك الوضع ويفهمك هذا الى بسمع منه


اما الى يجي يطقني لجلس ادعي عليه ليل ونهار هع هع



اخوي بس فهم اخوك لا تطقه


شكرااا اخووويه

ماشاءالله ردودكم كفت ووفت

بس حبيت اضيف نقطه تقهرني كثير في الشباب مب بس في المراهقين
كثرة استهزائهم باللي يقوم يصلي ولااذا دق ابوه واستعجل يروح يلبي طلبه..ولا اهله اذا احتاجوه وغيرها
كل شي عندهم ضحك ومسخره...والولد يرتبك مايبى حد يشوفه بنظرة نقص...ولا جملتهم :مانت رجال!!... طيب المرجله في الخطأ ماتصير..بس لان الولد صار مثل التابع منقاد ورى تعليقاتهم وكلامهم لغى عقله وتربيته ودينه

مثال في العلاقات مع البنات..يكونوا جالسين وتلقاهم يرموا التلفون على المسكين ووحده من اياهم على الخط ويعزموا عليه يكلمها المسكين الوام الطيف في وجهه من نظراتهم وتعليقاتهم...طبعا اذا رفض وقام طلعوه ناقص رجوله وخواف وكذا واذا كلمها فهو شاطر وقدها...وبكذا تبدى بداية النهايه
وغيرها امثله..
المشكله يوم مايحصل الدعم الطيب اللي يلحق عليه من التمادى مثل اخو ثقه وناصح له...يقوله باللي صار معه وينصحه لايكمل معاهم ولاطريقهم الخربان...
ويفهمه انه مش لانه ولد خلاص كل شي مباح لا طبعا..سمعته بتضر فيه وفي اهله وفي عياله إن شاء الله يوم يجوا بكره

وطبعا اتظل النصيحه مع الحزم افضل الطرق لتفادي تفاقم الخطر

والمتابعه معاه وان كان يقدر على المسؤوليه فالزواج المبكر ابرك واعف له

والله موضوع ولو انه مالي فيه ذاك الزود لكن بقولكم رايي والي أنا بتبعه ويا عيالي في المستقبل إن شالله

أولا انا اكتشفت انكم كلكم دكتاتوريين درجة أولى
وش معكم بسم الله على المراهقين؟ هاذي أحلى سنين عمرهم ويكذب الي يقول المراهقه بس مرحلة خطر..
المفروض الوالد يكون صديق لابنه، والوالده تكون صديقة للبنت، وبهالطريقة الاثنين بيعرفون كل شي عن عيالهم
بدون استجوابات و أسلوب بايخ ماله داعي يكره المراهق في الوالدين، ويخرب علاقته فيهم، وبعدين يحصل عقوق الوالدين..
والشي الثاني، بالله عليكم انتوا تقدرون الإنسان الي ما يثق فيكم؟ المفروض الأبناء ينعطون قدر كافي من الثقه لأنه هالشي بيشعرهم بالمسؤوليه انهم ما يخونوا هالثقه ( هذا لو ماكانت النذاله طبع يسري في دماء العائله)
طبعا ما نهمل دور التربيه في الصغر، الدراسات اثبتت انه من عمر 2 إلى 6 سنين تتكون شخصية الطفل وهي الفتره الي يكون ما يعرف فيها غير الوالد والوالده والمفروض بشكل مقرب مثل ما ذكرنا سابقا..

باختصار
لو كنت صديقه وتثق فيه و بنيت شخصيته صح في الصغر ان شالله مابتشوف غير كل خير منه وأهم شي الثقه
ونفترض انه غلط، وسوا شي وكشفته، ما تظنوا انه نظرتكم له بإن قدره نزل بيأثر فيه؟؟
ولا تنسوا انه الاغلاط و المعاناة هي المسؤوله عن تشكيل شخصياتنا في المستقبل، والي يغلط ويتوب أحسن بمليون مره من الي ما قد غلط..يعني يا لحولي عطي فرصه لاخوك يغلط ويتعلم و يتوب قبل لا تفضحه..مثل ما انته سويت في الماضي..
أنا أقترح المره الجايه وان شالله ما تجي انك تنصحه بينك وبينه بدون ما تروح تفضحه، يعني استر على اخوك.. خصوصا لو سوا شي في معصية لله والعياذ بالله..