قال الذي.......محمد صالح الدفيعه المصعبي

قال الذي من علم وقته تعلم=دروس من واقع علينا مهمه
ماهي دروس المدرسة والمعلم=والمنهج اللي لازم إنا نتمه
ياسامع القول اسمعه زين وافهم=قافٍ بنيته زين واحكمت نظمه
أمثال من واقع علينا محتم=مرّت على اللي قبلنا مر علمه
ماحد على بقعاء من الموت يسلم=كلن وله يومه يناديه بإسمه
قضاه رب الناس في اللوح قد تم=ماعاد له رجعه ولا فيه كلمه
دنياك لو فيها تعنّى وتهتم=وتطرد وراها طرد في كل يمه
ماانته محوش غير ذي لك مقسّم=وماحد يحصل رزق ماهوب قسمه
والناس في دنياك أنواعها كم=لو جيت تحصيها لقيت المطمه
ناس ٍ متى لاقيتها لك تبسم=وان غبت يمسوا فيك هرج ومذمه
عاداتهم في عرض الأجواد بالذم=وقلوبهم كنها السباء فوق فحمه
وناس ٍ متى لاقيتها لو تسلم=ردت سلامك من ورى نفس رمه
كنك لها قريت مطلوب في دم=وانت ماعندك لها أي تهمه
وناسٍ متى لاقيتها لا تكلم=سكوتك أفضل لك وماجاك ضمه
حيّات رقطا من قربها تسمم=يدس في هرجك معه كل سمه
عاشوا على الفتنه لبوهم جهنم=جزى من الخالق على كل نمه
ذولا مفارقهم كسوبه ومغنم=وعز لمقامك عن مقامات خمه
والأجواد ماجوده ولا كان تعدم=وأنا أشهد انهم للمعادين نقمه
فزعاتهم للي دعاهم تجلي الهم=واجب عليهم له يجلّون همه
ربعٍ ٍ معك يوم المهمات محزم=ووقت النسم حولك الأجاويد لمه
ترقا برفقتهم على النايف الشم=وتشرب كرع يروك لونه وشمه
هم نورك الساطع متى ليلك أظلم=تسري بضاح نجومهم كل عتمه
صديقهم يعزم ويكرم ويحشم=وغريمهم يدفن مغسل بدمه
صديقهم من جور الايام ماأغتم=يعنّز عليهم في الثقيلات غمه
يقضون عازاته وماكان يلزم=أنا أشهد ان خوة الأجاويد نعمه
ريف الخوي ولجرح الأيام بلسم=شافي بعون الله جرحه يلمه
والختم صلى الله وبارك وسلم=على النبي اللي هدانا بعلمه

الهماصلي وسلم عليه

وصح لسانك وانشهدانهاقصيده ممتازه

قناص ال فجم

صح الله بدانك


شكرا على مرورك وردك الطيب شهاده نعتز فيها

تحياتي لك

صح اللة لسان الشاعر
ونتمنى لفادتنا بكل جديد من الشعر الذي
يمتع الجميع بقراءتة

الدهولي


صح الله بدانك


وشكرا على مرورك وتواصلك لاعدمناك

تحياتي