ياسرحان في راس نايد..........محمد صالح الدفيعه

قال الذي يبني بيوت القصايد=أبيات للسامع عساها مفيده
الله خلقنا من تراب الحمايد=لكن فرقنا بالصفات الحميده
عيال تسع شهور مافيه زايد=أما نقص ولا شهورة أكيده
ونعيش في الدنيا سنينٍ عدايد=نلقى السعد فيها ونلقى النكيده
وتالي المطاف الموت للروح صايد=مأمور من ربه لعبده يصيده
يمسي بعد دنياه تحت اللحايد=وحيد وعظامه بقبره هميده
والمتقي يبعث ويلقى الوعايد=والطاغيه يبعث ويلقى وعيده
كلن يلاقي ماكتب في الجرايد=يلقى كتابه فيه كامل رصيده
شفنا الحسد والحقد في الناس سايد=والمكر والبغضاء وصنع المكيده
المجتمع جاته عوايد جدايد=واتبدلت عادات كانت مجيده
يسعون ضد اللي حياته رغايد=ورزقه من ايد الله ماهوب بإيده
قلّ الحياء والكذب فالناس رايد=واللي يقول الصدق ماحد يريده
وإن مات عايب بروّزوا له شهايد=والاجودي لا مات ماهو فقيده
وراعي النصيحه مايلاقي فوايد=ماعاد حد يقبل نصيحة سنيده
واتفرقوا الأخوة وصاروا بعايد=واذا التقوا تبقا الخوافق بعيده
ماعاد هم واحد نهار الشدايد=وأشوارهم عوجاء ولاهي سديده
لكنّ ياسرحان في راس نايد=طبعك قوي الباس ماشي يكيده
مثلك على الشدات واسع بنايد=فيك الذكاء والدهاء ماانته بليده
ابا أنصحك يااللي تصيد القلايد=نصايحٍ فيها النصيحه قليده
إمسك بحبل الدين تجني الحصايد=نهار فيه الله يحاسب عبيده
والوالدين إسعى لهم بالسعايد=حذرا يجيهم في الخواطر نقيده
وأخوك لو يخطي عليك ويزايد=إدمح له الزلات لأنك عضيده
والنفس سقها للمعالي سنايد=تكسب شرف وأيام عمرك مديده
والجار لا ترضى عليه النكايد=الجار قبل الدار قدهي نشيده
وأكرم ضيوفك في نهار البرايد=وأكرم نهار الجوع يفتق حديده
مايبخل الا اللاش نسل البلايد=وماجاد غير اللي عصوبه جويده
وإن جاك ناصي قال يابا العوايد=ينخاك من ضيم الليالي الشديده
افزع معه حيث الجمايل عوايد=يذكر جميلك لين يدري حفيده
هذا وصلى الله على خير قايد=المصطفى الهادي لزين العقيده