يانور عيني...محمد صالح المصعبي

يانور عيني جمالك في العرب غير=ماشفت حد يشبهك في أرض الجزيره
حسنك من الله ولا يحويه تصوير=مفنود نوعه ولا يوجد نظيره
مثل البدر في دياجير الدجى تنير=والناس في الأرض لك تمسي سهيره
من دونك الليل موحش بالدياجير=ولولاك ما في الشهر ليله نويره
ذابعض وصفك وأنا أدري فيه تقصير=حتى الصور فيك ماكانت جديره
لأن القوافي لحسنك ترفض تسير=والصمت عن نظمها أبلغ وخيره
حتى حلو في وصوفك تخجل تحير=لأن الحلى من حلاتك تستعيره
مزيون مملوح ماتوفيك تعبير=مجمول معسول في وصفك قصيره
يافتنة الله في خلقه بتدبير=فتنت قلبي ولا لي قلب غيره
عينك مثل عين شيهان الصقاقير=لا شاف زول الحباري مستذيره
وألحاظها مخلبينه ساعة يطير=من تضربه طاح وأصوابه خطيره
من يوم شفتك وفي قلبي تباشير=مثل الصحاري بالأمطار الغزيره
من بعد عقدٍ مضى منه مقافير=مرت سنينه ولا ليله مطيره
من مرّها ساق ذوده للمنادير=وش له بديره مراعيها قفيره
الأشجار فيها تناوشها الأعاصير=وتجتثها لين ترميها كسيره
واليوم لا والله إنها غير وبخير=والفضل لله ولك صارت خضيره
حبك سقى القلب وأنبت لك نواوير=ترعاه ذودك ولا معها خشيره
والأمر لله في لوح المقادير=ماحد يرد القدر لا حام طيره
ولا الهوى منه أنا من دون تفسير=حلفت ما أحب أحد وأصبح عشيره
إلا إن حصلّي هوى سيد الغنادير=اللي على الغيد مركزها الأميره
جابك لي الله بعد طول المشاوير=فيّه لقلبي بعد حر الهجيره
خذ خافقي لك خذه وبدون تأخير=والروح خذها مع قلبي أسيره
بس إروني فالهوى من جمة البير=رحمه لكبدٍ من الماضي فطيره
الحب أعمى ولا يعرف معاذير=يمشي على الله ولا يعرف مصيره
لا تعتذر يوم أجيكم صبح وعصير=وأقول مشتاق وأشواقي كثيره
من حقي أشتاق وأسال عنك وأغير=يابحر تحنان نفسي به قريره
وإن يوم حبيت غيرك جعلك بخير=إدر إن عيوني غدت فعلا ضريره