صديقي من يقاسمني همومي ويرمي با العداوه من زماني

سلام عليكم

الخوي عند العرب قسمه سمين وقدره عندهم رفيع لدرجة ان البعض منهم اقصد قبيله من القبائل تفضل الخوي او الصاحب على الخال وذلك لما للخوي من قدر وحشمه وكل القبائل العربيه تثور اي تفزع مع الخوي وهو مايعرف بخوي الجنب..وللأسف الخوه في هذا الوقت لم تكن كما كانت عليه سابقا على العز والنقاء الا من رحم الله.واريد ان اعطيكم سالفه احصلت في وقت ليس بالبعيد واعتقد بأنه لم يكتب عنها في المنتديات وذلك لصلتي مع اهل القصه..

يوجد شيخ من المشايخ يحل المشاكل ويفك النشب فيما بينهم وهو مايسمى مقطع الحق..يوجد لديه احد الأبناء اكثر وقته مع اصدقائه فهو لايحظر المناسبات ولايساعد والده كثيرا وكل ما طلب منه والده شيئا قال انا مع اخوياي انا مشغول معهم..واراد والده ان يؤدبه ويعطيه درس لن ينساه طوال حياته..

ليله من الليالي وفي اخر الليل انتظر ولده يرجع وجلس ينتظره الى ان وصل الولد وقال له ياولدي انظر لماتحت السجاده او مايسمى بالزوليه وكانت في حوش البيت وكان الدم الحمر يسيل من جوانبها وقال ويش العلم يابوي قال له لقد ذبحت احد المتخلفين ولايعرف احد في هذا الموضوع وابغاك مع اثنين من اخوياك تساعدوني على اخفاء الجثه وباقي الامور.. رح ولاتجي الا بهم وذهب الابن لأخوياه وعلمهم بالعلم وقالو ابوك لابو البعيد ويش دخلنا ابوك يذبحله رجال ونجي انساعده...المهم رجع الولد عند ابوه وقال ياوالدي ماحد رضي يفزعلي قال الاب ياولدي تعرف خويي افلان اللي دايم معي قال نعم قال رح وزهمه وقول ابوي يبيك راح الصبي ودق على باب صديق والده وقال ياعم فلان الوالد يبيك قال ابشر ووصل الرجال عند خويه والولد موجود وقال ياخويي مازهمتني تالي الليل الا وعندك علم وناحاظر بالحال والمال وهذا انا وهذا سلاحي وهذا مالي يقصد دفتر الشيكات قال الاب اناذابحلي رجال تحت ذيك الزوليه ويش السواة ...رد عليه خويه وقال ابشر ماذبحه غيري ونا غريم ربعه وجماعته وحالي ومالي من دونك ياخويي ... قام الشايب وسحب البساط من فوق الجثه ووجدو قعود منحور نحره الشايب للتمويه وقال ياولدي اخويا الرخا ياكثرهم وخويا الشدايد ياقلهم......وفهم الابن بأنه ليس كل صاحب صاحب وان الرجال فيهم الطيب وفيهم الخيّب وان يختار من اخوياه من يدله على الخير

بيض الله وجهك ياراعي ريدان على السالفه الطيبه اللي فيها عبره لمن يعتبر

وخلان الرخا ياكثرهم ذا الوقت

لا يغرك من يجي في المجالس له هذيل.....بعضهم في ساعة الصدق مايطلع رجل


تحياتي

تسلم اخي العزيز راعي ريدان لاعدمناك ياالغالي.. وصدق الشاعر حين قال . ماأكثرالاصحاب حين تعدهم:: لكنهم عند النائبات قليلو
وقال شاعر آخر. عندالعوافي مااكثراصحابي معي في كل بيت:: وان قد بلينا ساعة اللزات ماواحد لقيت ..